Научно-исследовательская работа студентов

Студенттик илимий-изилдөө иштери

Билим берүүдө адистерди даярдоонун сапатын жогорулатууда студенттик илимий-изилдөө иштери маанилүү орунду ээлери талашсыз.

ОшМУда студенттердин илимий-изилдөө иштери негизинен төмөнкү формаларда жүргүзүлөт: курстук, дипломдук жумуштар, дипломдук долбоорлорду, рефераттарды, баяндамаларды жазуу, илимий конференцияларга, семинарларга, олимпиадаларга, конкурстарга, долбоорлорго, илимий ийримдерге катышуу ж.б.

Студенттердин илимий-изилдөө иштеринин жүрүшүн, натыйжасын жана сапатын текшерүүнүн негизги формаларынын бири катары көп жылдардан бери адатка айланган илим жумалыктарын өткөрүү болуп эсептелет. 2018-жылдын март айынан июнь айына чейин университеттин бардык факультеттеринде алдын-ала бекитилген график боюнча илим жумалыктары уюштурулду.

Илим жумалыгынын алкагында факультеттерде төмөнкү иш-чаралар өткөрүлдү:

· илимий конференциялар, семинарлар: профессордук-окутуучулук курамдын, аспиранттардын, студенттердин илимий баяндамалары;

· илимдин тиешелүү маселелерине багытталган тегерек столдор;

· инновациялык сабактар;

· илимдин өнүгүү жолдоруна, багыттарына жана көйгөйлөрүнө багытталган дебаттар;

· дубал гезиттер, кроссворддор, акыл-таймаш оюндары, конкурстар, сынактар;

· адистик предметтерден жана жалпы кесиптик дисциплиналар боюнча олимпиадалар;

· студенттик илимий ийримдердин иштеринин көргөзмөсү;

· дипломдук иштердин алдын-ала жана курстук иштердин корголуусу;

· чыгармачылык көргөзмө жана отчеттук концерттер;

· «Мыкты илимий баяндама» сынактары;

· «Мыкты кафедра» көргөзмөсү.

Факультеттерде өткөрүлгөн илим жумалыктарындагы иш-аракеттерге кыскача токтололу.

Факультеттерге өткөрүлгөн илим жумалыктарында Ч.Т. Айтматовдун 90 жылдыгына, “Аймактарды өнүктүрүү” жылына, III Дүйнөлүк көчмөндөр оюндарына карата илимий багыттагы түрдүү иш-чаралар уюштурулду.

Тарых факультетинде III Дүйнөлүк көчмөндөр оюндарына карата “Улуттук оюндар – тарыхыбыздын башаты, каада-салтыбыздын өзөгү” деген темадагы студенттик илимий семинар өткөрүлүп, студенттердин, магистранттардын, жаш окумуштуулардын баяндамалары угулду жана студенттер үчүн “Адам үчүн эң кыйыны – күн сайын адам болуу” деген темада эсселердин сынагы өткөрүлдү.

Кыргыз-Кытай факультетинде “Конфуцийдин цитаталарынын кыргыз коомчулугундагы кээ бир көйгөйлөргө дал келиши” аттуу илимий семинар өткөрүлдү. Ч. Айтматовдун 90 жылдыгына карата “Русский язык – язык мира и дружбы” деген темадагы конкурс уюштурулду.

Кыргыз-Европа факультетинде Ч. Айтматовдун 90 жылдыгына арналган “Айтматов ааламы” аттуу тегерек стол, “Саманчынын жолу – адамзаттын жолу” аттуу адабий кече ж.б. иш-аракеттер уюштурулду.

Математика жана информациялык технологиялар факультетинде “Математиканын, информатиканын учурдагы маселелери жана алардын колдонулуштары” аттуу III илимий конференция өткөрүлдү.

Эл аралык медицина факультетинде илимий конференция өткөрүлүп, аспиранттардын баяндамалары угулду жана студенттердин өз алдынча иштеринин “Знатоки медицины” деп аталган көргөзмөсү уюштурулду.

Орус филологиясы факультетинде белгилүү методист А.П. Селиверстованын туулган күнүнүн 85 жылдыгына карата “Филологиянын, лингвометодиканын жана адабият дидактикасынын актуалдуу маселелери” аттуу IV аймактык илимий-практикалык конференция өткөрүлдү. Конференцияда 4 багытта секциялык иштер жүргүзүлүп, Ош шаарындагы жогорку окуу жайларынын БатМУнун магистранттарынын жана окутуучуларынын, мектеп мугалимдеринин 59 баяндамасы угулду.

Медицина факультетинде профессор Ж. Жеенбаевдин 70 жылдык юбилейине арналган XXIII студенттик илимий конференция өткөрүлдү.

Эл аралык мамилелер факультетинде “Чыгыш таануу жана африканистиканын актуалдуу маселелери” аттуу илимий конференция өткөрүлдү.

Финансы-юридикалык коллежинде Ч. Айтматовдун чыгармаларына араналган илимий конференция, илимий кече ж.б. иш-чаралар уюштурулду.

Ош медицина коллежинде “Медицина кызматкерлеринин дарылоо – алдын алуу иш-аракеттери” деген темадагы студенттик I конференция өткөрүлдү. Илимий жетишкендиктердин көргөзмөсү, студенттердин арасында олимпиада, окутуучулар арасында “Мыкты баяндама” конкурстары уюштурулду.

Искусство факультетинде адистик өзгөчөлүгүнө жараша Ч. Айтматовдун 90 жылдыгына “Аймактарды өнүктүрүү” жылына карата окутуучулар үчүн иш-чаралардын системасы уюштурулду. 16-18-апрель күндөрү уюштурулган “Илим жана искусство” жумалыгында илимий жана илимий-чыгармачылык семинарлар, отчеттук жана чыгармачылык концерттери, лекция-концерттери, музыкалык кечелер, түрдүү сынактар жана конкурстар, фестивалдар, сүрөт көргөзмөлөрү өткөрүлдү.

Кыргыз Республикасынын Билим берүү жана Илим министрлиги тарабынан 2018-жылдын 20-декабрында Кыргызстандын жогорку окуу жайларынын студенттеринин арасында уюштурулган “Ч. Айтматовдун чыгармачылыгына эң мыкты студенттик изилдөө” аттуу улуттук конкурста искусство факультетинин 3-курсунун студенти Бекмурат кызы Гулзада баш байгени утуп алып, 45 мин сом акчалай сыйлык менен сыйланды (жетекчиси – пед.и.к., доцент А. Батыралиев).

Искусство факультетинин доценти Б. Абдувалиев жетектеген “Салтанат” оркестри жана улук окутуучу Ж. Атабаева студенттери менен биргеликте III Дүйнөлүк көчмөндөр оюндарына чыгармачылык концерттик программасы менен активдүү катышкандыктары үчүн Ош облустук ыйгарым укуктуу өкүлчүлүгү тарабынан “Алкыш” баракчаларымененсыйланышты. Мындан сырткары, Ж. Атабаева 2018-жылдын октябрь айында Казакстанда өткөн “Кыргыз-казак достугуна” арналган фестивалына катышкандыгы үчүн “Чебер комузчу” диплому менен сыйланды жана “Даанышман инсан” алтын медалын алды.

Көчмөндөр оюндарына профессор Т. Кадырбаева жетектеп барган улук окутуучу З. Турдубаеванын авторлугунда даярдалган коллекциялар “Саркеч кийимдер” көргөзмө-сынагында 1-орунга татыктуу болуп диплом менен сыйланды.

Студенттик илимий ийримдерди өткөрүү Эл аралык медицина, бизнес жана менеджмент, орус филологиясы, математика жана информациялык технологиялар, физика-техника, табият таануу жана география, дүйнөлүк тилдер жана маданият, педагогика жана дене тарбия, эл аралык мамилелер факультеттеринде, Ош медициналык жана финансы-юридикалык коллеждеринде, мамлекеттик тил кафедрасында жакшы жолго коюлгандыгын белгилөөгө болот.

Студенттик илимий иштерди өркүндөтүү багытында илимий ийримдердин иш-аракеттерин мындан ары да өркүндөтүү кажет.

2018-жылы 14-апрелде Ош гуманитардык педагогикалык институтунда өткөрүлгөн VII аймактык студенттик олимпиадага ОшМУнун студенттери активдүү катышышты. Олимпиадага февраль-апрель айларында университеттин бардык факультеттеринде активдүү даярдык жүргүзүлүп, 1-2-турлар факультеттик, университеттик деңгээлде өткөрүлүп, мыктылар 3-турга тандалды. Бардык адистиктерде адистик жана предмет боюнча олимпиадага жооптулар дайындалып, тиешелүү тапшырмалар, тесттик суроолор, маселелер, мисалдар, педагогикалык ситуациялык маселелер кылдат даярдалып, Ош гуманитардык педагогикалык институтуменен биргеликте, активдүү иш алып барылды.

Түштүк аймагындагы 9 жогорку окуу жайдын студенттери катышышкан бул чоң сынакта ОшМУнун студенттери 28 предмет боюнча ат салышышты. Жыйынтыгында, ОшМУнун студенттери жалпы командалык эсепте 1-орунга татыктуу болушту. 1-орунду ээлеген жеңүүчүлөргө жана аларды даярдаган жетекчилерине ноябрь айында өткөн Илим күнүнө карата салтанаттуу жыйында дипломдор жана акчалай сыйлыктар ыйгарылды.

Белгилей кетсек, ОшМУнун студенттери 2012-жылдан бери өткөрүлүп келе жаткан аймактык олимпиадада үзгүлтүксүз 1-орунду алып келишет.

Аймактык олимпиададан сырткары ОшМУнун студенттери түрдүү адистиктер боюнча республикалык, эл аралык деңгээлдеги олимпиадаларга катышышып, байгелүү орундарды ээлешти.

Математика жана информациялык технологиялар факультетинин 1-курсунун студенти М. Ирисматова 2018-жылдын 26-31-октябрында Өзбекстандын Ургенч шаарында окумуштуу Мухаммад ибн аль-Хорезмдин урматына арналган 2 жылда бир өтүлүүчү математика боюнча англис тилиндеги эл аралык олимпиадада 3-орунду ээлеп, коло медалына татыктуу болду (жетекчилери – информатика кафедрасынын профессору Д. Турсунов жана окутуучу Г. Шамшиева).

2018-жылдын 3-майында Б.Н. Ельцин атындагы Кыргыз-Россия славян университетитарабынан уюштурулган колдонмо математика боюнча XII ачык интернет-олимпиадага катышкан МИТ факультетинин 2-курсунун студенти Э. Акылбек уулуна, калыстар тобунун төрагасы, КУИАнын мүчө-корреспонденти П.С. Панков 11-майда ОшМУда өткөрүлгөн конференцияда 1-даражадагы алкыш тапшырды.

Табият таануу жана география факультетинин география адистигинин студенттери Абдылас кызы А., (4-курс), Г. Мамирасулова (3-курс), Женишбек уулу М., (2-курс), С. Айткозуева жана Н. Эркинбековалардан (1-курс), түзүлгөн команда 2018-жылдын 18-19-октябрында К. Тыныстанов атындагы Ысык-Көл мамлекеттик университетинин базасында өткөрүлгөн Республикалык жогорку окуу жайлар арасында география боюнча II олимпиадада 7 команданын арасынан биринчи орунду ээледи (жетекчилери – экономикалык, социалдык жана саясий география кафедрасынын улук окутуучусу К.Д. Калилов, физикалык география жана ТТК кафедрасынын окутуучусу А.М. Аташбаев).

2018-жылдын 20-25-майында Б.Н. Ельцин атындагы Кыргыз-Россия славян университети тарабынан уюштурулган жогорку окуу жайлар арасындагы VIII республикалык олимпиадада бизнес жана менеджмент факультетинин студенттери Г. Шериева “Финансылык эсеп” дисциплинасы боюнча 2-орунду, Кабылжан кызы “Экономикалык анализ” дисциплинасы боюнча 3-орунду багындырышып, дипломдор менен сыйланышты (жетекчилери – бухгалтердик эсеп жана экономикалык анализ кафедрасынын доценттери И.Р. Мырзаибраимова, Д.А. Осмоналиева).

Медицина факультетинин студенттери И.К. Ахунбаев атындагы КММАда КУИАнын академиги К.Р. Рыскулованын 100 жылдык мааракесине арналып өткөрүлгөн жогорку окуу жайлар арасындагы “I эл аралык студенттик олимпиадага” хирургия предмети боюнча катышышып, 9 команданын арасында 4-орунду ээлешти (жетекчиси – хирургиялык оорулар кафедрасынын профессору А.Ш. Абдиев).

Б.Н. Ельцин атындагы Кыргыз-Россия славян университетинин 25 жылдык юбилейне арналган медициналык жогорку окуу жайлар арасындагы республикалык студенттик олимпиадада медицина факультетинин студенттери терапия адистиги боюнча III орунду ээледи (жетекчилери – №1 ички оорулар кафедрасынын профессору А.Т. Мамасаидов жана №1 педиатрия кафедрасынын доценти У.Б. Шерматова).

Эл аралык медицина факультетинин 3-курсунун студенти Рушикеш Локаре Түштүк Урал мамлекеттик гуманитардык-педагогикалык университети тарабынан уюштурулган, чет элдик студенттер үчүн орус тили предметинен интернет-олимпиадада 2-орунду ээлеп, кубок жана диплом менен сыйланды (жетекчиси – социалдык-гуманитардык дисциплиналар кафедрасынын окутуучусу А.Н. Гаипова). Предметтик олимпиаданын негизги максаты – окутуунун сапатын жогорулатуу, жаштарда илимий-чыгармачылыкка болгон кызыгууну өркүндөтүү жана таланттуу студенттерге стимул берүү болуп саналат. Бирок бул багытта коллеждер арасында дээрлик иш-чара өткөрүлбөгөндүгүн эске алуу менен, үстүбүздөгү окуу жылында ОшМУнун демилгеси менен экономика, медицина жана педагогика багыттарындагы коллеждерде окуп жаткан студенттердин арасында республикалык, аймактык предметтик олимпиада өткөрүлмөкчү. Учурда өтүлүүчү предметтик олимпиадалардын Жоболору иштелип чыкты жана башка окуу жайлардын жетекчилери менен макулдашылды.

2018-жылы көптөгөн студенттер жана магистранттар чет элдик программалар менен долбоорлорго, кароо-сынактарга, семинарларга катышышкан, курстардан өтүшкөн ж.б.

2018-жылы 362 студент жана магистрант Мевлана, Эразмус+, УШОС, ДААД, SUSI ж.б. түрдүү программалардын алкагында, жогорку окуу жайлар аралык эки тараптуу келишимдердин негизинде Түркия, Кытай, Түштүк Корея, Япония, Казакстан, Өзбекстан, Тажикстан, Монголя, Чехия, Швецария, Испания, Венгрия, Бельгия, Германия, Швеция, Россия, Катар, Индия, Иран, АКШ ж.б. мамлекеттерге барып билим алышып, кышкы жана жайкы мектептерге катышышып, илимий-изилдөө иштерин жүргүзүп келишкен.

2018-жылдын 2 9 -ноябрында Ош мамлекеттик университетинде илим күнүнө карата “Студент жана илимий-техникалык прогресс” аттуу V аймактык студенттик илимий конференция өткөрүлдү.

Конференцияда Кыргызстандын 15 окуу жайынан келип түшкөн 200гө жакын баяндамалар 8 секцияда талкууланды. Ч. Айтматовдун 90 жылдыгына карата “Ч. Айтматовдун адабий жана философиялык мурастары”, “Аймактарды өнүктүрүү жылына” карата “Кыргызстандын аймактарынын өнүгүүсүнүн социалдык-экономикалык көйгөйлөрү” деген темалардагы секцияларда 40тан ашуун баяндамалар угулду. Илимдин бир нече багыттары боюнча иш алып барган 8 секцияда алдыңкы 150дөн ашуун студенттердин баяндамалары жасалды жана мыкты деп табылган баяндамаларга дипломдор ыйгарылды. Конференцияда ОшМУдан жалпысынан 72 студент баяндамаларын талкууга коюшту жана алардын ичинен 29 студент алдыңкы орундарга ээ болушту.

Мындай илимий иш-чара студенттердин илимий байланыштарын жандандырууга, алардын идеяларын бириктирүүгө өбөлгө түзүп келет. ОшМУда аймактык студенттик илимий конференция 5-ирет өткөрүлдү жана жыл сайын өткөрүлүүчү традициялык илимий иш-чарага айлангандыгын белгилөөгө болот.

Конференцияда талкуудан, “Антиплагиат” системасынан жан эксперттердин тыкыр текшерүүсүнөн өткөн макалалар “ОшМУнун жарчысы” илимий журналынын атайын чыгарылыштарында 2016-жылдан бери акысыз

жарык көрүп келет.