Ош мамлекеттик университетинин жамааты каражат топтоп 24 саат үзгүлтүксүз иштөөчү жети даана кычкылтек концентраторлорун Ош шаардык ооруканасына тапшырды.

ОшМУнун Эл аралык медицина факультетинин жамааты 1 даана, Медицина факультетинин жамааты 1 даана, Медициналык колледжинин жамааты 1 даана алып беришсе, МИТ факультетинин жамааты жалпы 4 даана кычкылтек концентраторлорун алууга салым кошушкан. Алардын ичинен МИТ факультетинин бүтүрүүчүлөрү, ОшМУнун ректору Кудайберди Кожобеков жеке өзүнүн эсебинен 1 даана, факультеттин (МИТ) 1998-жылкы бүтүрүүчүсү Алиев Кубаныч 1 даана алып беришкен.

Ага кошумча учурда зарыл болгон медициналык каражаттар: алты даана кварц лампасын, кандагы кычкылтектин денгээлин, сатурациясын өлчөөчү алты даана пульсоксиметр, алты даана пульверизатор жана 140 даана респиратордук беткап да берилди.

Мындан сырткары окуу жайдын беш жатаканасында уюштурулган ооруканада иштеп жатышкан 51 медкызматкерлерге түшкү тамак берилип жатат.

Бейтаптарга медициналык жардам берүү максатында Ош мамлекеттик университетинде түзүлгөн резервдик тобундагы 9 дарыгер-ординатор Чон-Алай районунда, 10 медицина кызматкери Кара-Кулжа районунда, 5 дарыгер-ординатор Ош шаарындагы Газпром спорт комплексинде уюштурулган күндүзгү стационарда, 45 медкызматкерлер ОшМУнун медициналык клиникасында иштеп жатышат.