Кыргыз Республикасынын Өкмөтүнүн 2016-жылдын 2-сентябрында чыккан №391- тескемесине ылайык, Афганистан Ислам Республикасынын Чоң жана Кичи Памир аймактарында жашаган этникалык кыргыздарга гуманитардык жардам көрсөтүү максатында уюштурулган экспедициянын курамында ОшМУнун “Чет өлкөлөрдөгү этникалык кыргыздарды изилдөө борборунун” атынан ОшМУнун доценти Абазбек уулу Расул бүгүн, 4-октябрь күнү жөнөп кетти.

ОшМУнун доценти Абазбек уулу Расул өзү менен биргеликте ОшМУнун жетекчилиги тарабынан демилгеленип ушул жылдын 25-февралында уюштурулган “ОшМУдан оогандык кыргыздарга жардам!” аттуу кайрымдуулук марафонунан түшкөн 384 миң сом акча каражатына алынган күнүмдүк турмушта керектелүүчү буюм-тайымдар, кийим-кечектер, азык-түлүк, концелярдык каражаттарды экспедициянын коштоосунда Ооган кыргыздарына алып кетти.

ОшМУ буга чейин бул кызматташууда төмөнкү иш-чараларды аткарууну максат кылган болчу. Алар Ооган кыргыздары жөнүндө тарыхый, маданий жана демографиялык жалпы маалыматтарды топтоо, анализдөө, Ооган кыргыздарынан каалоочу 5 өспүрүм жаштарды Кыргызстанга алып келип орто, кесиптик же жогорку билим алуусуна баардык шарттарды түзүп берүү (жатакана, тамак-аш, окуу акысы ж.б. чыгымдары окуу жай каржылап берет). окуу жайдын жамааты тарабынан гуманитардык жардамдарды (кийим-кече, күндөлүк колдонуучу буюмдар, окуу куралдары жана окуу каражаттары ж.б.) топтоо жана аны жеткирүү.

Белгилей кетсек, ОшМУда 2015- жылдын июнь айында “Чет элдик кыргыздарды изилдөө борбору” ачылган. Борбордун негизги максаты – чет өлкөлөрдө жашаган кыргыздардын жашоо турмушун, тарыхын, салт-санаасын, маданий баалуулуктарын илимий негизде изилдөө менен алардын социалдык-экономикалык жана демографиялык абалын жакшыртуу жолдорун аныктоо болуп саналат.

4381 12:10 04-10-2016